للكوسة فى بلادى شئون

للكوسة في بلادى شئون

بتخلي المسنود فرعون

يتفرعن فين مهما يكون

وتخلي الجاهل أستاذ

والأعرج لاعب جمباز

وتخلي الأحول هداف

والكورة الآوت ف الجون

للكوسة ف بلادى شئون

لو تعرف واحد ف الشرطة

راح تخرج من أجدع ورطة

والراجل إللي إنت ظلمته

تلاقيه متلقح مسجون

أو تعرف شخصية كبيرة

شغالة ف البنك مديرة

راح تاخد من غير ضمانات

كام قرض بمليون مليون

وهروبك طبعا مضمون

ويا عيني لو تعرف نايب

ف المجلس مش نايب خايب

راح تبني أبراج وهمية

أوراقها مظبوطة أكيد

وفلوس الناس المهرية

هتجيلك م الجيب للإيد

بعديها تروح المستشفى

وتقيد نفسك مجنون

أحكامك تسقط ف ساعتها

بعديها ترجع موزون

ويا عيني لو تعرف شيخ

فجنابك طاهر علطول

وصيامك طبعا مقبول

وإذا فرضا حبيت تتجوز

تتجوز من غير مأذون

وإذا ساكن ف عمارة جديدة

وحبيبك راجل مسئول

فسيادتك من غير ما تقول

يركب لك فورا تليفون

ولو إنت عندك عربية

ونمرها سودة بنسرين

هتعدي أجدعها كمين

وهتكسر أوضحها إشارة

ماهو نمرك سودة جبارة

ولا تعرف أيتها قانون

ولو إنت بتعرف فرّان

أو واحد بياع جرنان

راح تاخد طلبك وهتمشي

من غير ولا دوشة ولا دور

والناس الغلبانة هتاخد

طلباتها بعدك وتغور

ماهو كله غيرك بيهون

ولو إنت زميل الحلاق

راح تحلق أولها زبون

وإذا كنت بتعرف دكتور

هتعيش متطمن مسرور

وهتسلك فى لجان الشفوي

ومجال تعيينك موفور

وهتطلع ف التليفزيون

بالبدلة وفيها الببيون

تتكلم وبكل بساطة

عن شرف المهنة المدفون

___________